NÁÐU STJÓRN Á DÝPTINNI

Sökkhraði og dýptarstýring

Flugulínur með mismunandi sökkhraða eru flestum kunnugar í formi sink-tip lína – þ.e. fljótandi lína með sökkvandi enda. Hefðbundnar sökklínur eru húðaðar með plasti þar sem tungsten er blandað í mismunandi magni til að fá ólíkan sökkhraða. Vegna þess að línan mjókkar fram eftir sér sekkur hún hraðar þar sem hún er þykkari og massameiri, en hægar þar sem hún er grennri.

Í veiðum þýðir þetta einfaldlega að endinn sekkur hægar en miðjan og afturendinn. Línan liggur því ekki bein í vatninu heldur myndar boga. Þetta hefur áhrif á hvernig flugan vinnur og – ekki síður – á tenginguna við hana. Þú þarft oft að byrja að strippa til að koma flugunni niður á rétt dýpi, þar sem lægsti punktur línunnar ræður í raun hvar flugan er að veiða.

Nýrri línur eru hannaðar með svokallaðri þéttleikajöfnun. Það þýðir að grennri hlutarnir eru gerðir þéttari til að jafna sökkið eftir allri línunni. Niðurstaðan er að línan sekkur mun beinna, án þess að „hanga í boga“. Flugan fer því hraðar niður á rétt dýpi og liggur rétt í straumnum. Þetta skilar sér líka í miklu betra sambandi við fluguna.

Þegar veitt er með þungum sökklínum borgar sig yfirleitt að hafa tauminn sem stystan til að koma flugunni hratt niður.

Þyngri og þéttari endi hefur líka áhrif í kastinu – hann sker loftið betur og gerir þér kleift að halda línunni þéttari, auka hraðann og ná lengri köstum þegar þarf.

Stefna kastsins

Kaststefnan hefur gríðarleg áhrif á dýptina. Kasta beint eða niður og yfir gefur línunni tíma til að sökkva og vinna sig niður í strenginn. Ef þú kastar þvert yfir ána lyftir straumurinn línunni meira upp og minnkar dýptina.

Góð lagfæring (mend) og smá „hang“ í lokin getur líka látið fluguna vinna sig djúpt niður þar sem fiskurinn liggur.

Flugan sjálf – stærð og þynging

Stórar, loðnar flugur taka mikinn straum og eiga erfiðara með að komast niður. Stundum hegða þær sér næstum eins og þurrflugur.

Þá er lykilatriði að þyngja rétt – nota túpur, tungsten keilur eða aðrar þyngingar. Einnig er hægt að hnýta grennri flugur með minni búk og væng til að ná meiri sökkhraða.

Bucktail er klassískt efni sem margir hafa gleymt, en virkar frábærlega þegar þarf að koma flugu hratt niður.

Sökkhraði hjá Guideline og Airflo (IPS – tommur á sekúndu)

Sökkhraði flugulína er yfirleitt gefinn upp í IPS (inch per second), sem segir til um hversu margar tommur línan sekkur á sekúndu. Þetta er staðlað viðmið sem gerir veiðimönnum kleift að bera saman línur og velja réttan búnað fyrir mismunandi aðstæður.

Bæði Guideline og Airflo nota bæði þetta kerfi til að flokka sínar sökklínur / enda. Flokkar eins og S3, S5 og S7 vísa til mismunandi sökkhraða – því hærri tala, því hraðar sekkur línan og nær þannig betur niður á meira dýpi eða í sterkari straumi.

Mikilvægt er þó að hafa í huga að IPS-talan er fyrst og fremst viðmiðun. Raunverulegt veiðidýpi ræðst einnig af ýmsum þáttum, svo sem straumhraða, kaststefnu, taumlengd og því hvort línan fær að sökkva frjáls áður en hún spennist upp.

Greinarhöfundur er Andreas Möller hjá Guideline